తిరుమలలో భక్తులకు అందించే ప్రసాదం మరియు ఆహార పదార్థాల నాణ్యతను మరింత మెరుగుపర్చేందుకు ఆంధ్రప్రదేశ్ ప్రభుత్వం అత్యాధునిక ఆహార ప్రయోగశాలను ఏర్పాటు చేయనుంది. రాష్ట్ర ఆరోగ్య మంత్రి వై సత్యకుమార్ యాదవ్ తెలిపిన వివరాల ప్రకారం రూ. 25 కోట్ల వ్యయంతో ఈ కేంద్రం నిర్మాణం జరుగుతోంది. ప్రసాద తయారీలో ఉపయోగించే నెయ్యి, జీడిపప్పు, కిస్మిస్, బాదం, శనగపప్పు, చక్కెర, యాలకులు, పసుపు, మిరపపొడి వంటి సుమారు 60 ముడి పదార్థాల నాణ్యతను పరీక్షించే సదుపాయం ఉంటుంది. ప్రత్యేకంగా ఫ్రాన్స్ నుంచి దిగుమతి చేసుకునే “ఈ-టంగ్”, “ఈ-నోస్” యంత్రాలు నెయ్యి నాణ్యతలో స్వల్ప మార్పులనూ గుర్తించగలవు.
